Jahresbericht der Präsidentin 2025
Am 2. November 2024 hämer üs in Parpan bir Alpkäserei zur Johresversammlig troffa. D`Alpkäserei hämer törfa besichtiga und no an feina Apero gnossa. Ahschlüssend sind miar nach Churwalda in da Gmeindsaal. Wunderbar und perfekt händ Karin, Edith, Jörg und Petra dä Tag für üs organisiert. Herzlicha Dank euch für dä wunderbar Tag!
D`Wucha noch dar GV isch net grad so wunderbar gsi für alli. Miar händ dar Norovirus ufgläsa an üser Versamlig. I bin froh und dankbar händ alli dä Virus guat übrstanda.
Am 15. Novmber 2024 hät Hauptversammlig vom SAV in Schwanda, Glarnerland, statt gfunda. Dar Lieni und i händ döt an interesannta Tag verbrocht.
Am 21. November 2024 sind dar Stefan Bless und i and IG Alpkäse Versammlig nach Bern greist. An dem Tag häts g`schneit und g`stürmt. Bern isch wega weniga cm Schnee im Chaos still g`standa. Für mi, us am Safiatal, grad as bez verwunderlich.
In dar Adventsziit isch den für mi Ziit, Weihnachtskarta z`schriba. I findas wichtig das miar üs be verschidana Lüt und Institutiona bedankent.
Am 8. Januar 2025 hämer die erst Vorstandssitzig ka. Miar händ immer allerlei z`besprecha und erlediga.
An wichtiga Punk isch do d`Ehrig vom Alpmeister vom Johr gsi. In da letschta Johr sind wenig bis kei Ahmeldiga gsi. Miar hänt beschlossa, dia Ehriga i stella. Im Moment klära miar ab, wo dia Stei us gstellt werdend. Sie sölend an würdiga Ort erhalta, wo d`Öffentlichkeit Zuagang hät.
Im Grossrat isch an Hirtausbildig diskutiert worda. Am 15. Januar 2025 hät dar Vorstand vom BÄV dörfa a Stellignahm and Regierig abgeh. Mier hend deta gschriba, dass d Schwierigkeit, Alppersonal zu rekrutiera, nid di fehlendi Usbildig isch, sondern d Saisonalität und d`Aschtelligsbedingiga. D Regierig het den üsi Stellignahm als Grundlag für d Antwort uf die Afrag usem Grossrat gno.
Lieni und Andres sind am 11. Januar 2025 an da Älplertreff an da Plantahof. Dä ustusch isch für üs au wertvoll.
Am 14. Januar 2025 bin i mit ara Delegation vo Graubünda wieder uf Bern greist.
Alppersonal isch hüt z`grossa Thema gsi. Fascht as Johr vorher hät ma chöna an ara Umfrog mit macha. Älpler/Älplerinna hänt chöna Froga beantworta zu Arbeitsverhältnis, Lohn und was susch no wichtigi Thema sind für üs Älpler. Vo Graubünda händ viil Älpler mit gmacht. Danka viil mol euch!
Verschidani Pünkt hänt sich als wichtig ussgstellt.
-Z`Verhältniss mit dar Alpmeisterinn/ Alpmeister isch sehr wichtig. Jo sogar zentral um über mehreri Johr uf dar glicha Alp z`bliba. Alpmeister sie isch net jedem geh. Dar Alpmeister stot zwüscha Älpler und Pura.
Söt beidna Parteia grecht werda. Net immer eifach. Das Johr füahrt dar Plantahof an neua 3 Tägiga Kurs für Alpmeisterinna/Alpmeister i. Je nach Bedürfnis könnt die in einzelni oder mehreri Täg bsuacht werda.
-An witera Punkt isch Familiagründig wo dazua führt das ma nüma ufd Alp got. Ds greglata Ikomma und Schual wird zum Thema.
-Struktura uf dar Alp isch as wichtigs Thema. Zuafahrt und a guati Hütta. In Graubünda gröschtteils geh.
-Vertrag und dar Richtlohn kömmend nach da vorheriga Pünkt dä au zum Thema.
27. Januar 2025 sind Andres, Lieni und i an da Plantahof. Miar hänt am Peter Küchler danka gseit für sin Isatz fürd Alpwirtschaft. Im alles guati für d`Pension gwünscht. Hänt im an Gschenkkorb brocht. Peter hät Freut ka das miar, dar Bündner ÄlplerInnenverein, an in denkt hänt.
Am 11. März 2025 hät die erst Sitzig vom Johr in dar Alp und Milchwirtschaftskommission statt gfunda. In dar Kommission hämer insgesamt 6 Sitziga ka, davo 2 online. Am 19. August 2025 simer and Landsitzig uf Vals. Am Morga hämer üsi Sitzig ka. Dä isch üs d`Sennerei
Vals vorgestellt worda. Dia neu Sennerei isch sehr idrücklich. As zeigt wen ma zäma hebt und öpis eifach will, dä erreicht ma viel. Am Nohmittag isch Alp Gross Guraletsch vor Familia Vieli vorgstellt worda. Dar Bernhard isch mit dar Fachkommissions Mitglider über d`Weida und hät idrücklich erklärt. I selber bin noch am Mittag zruck uf Alp Piggamad….miar hänt as Wasser Problem müessa lösa. I bin vor as par Johr mit dar Annette und am Bernhard uf Alp Gross Guraletsch gsi. Idrücklich dar Isatz wo sie fürd Alp hänt.
Dar Ustusch in dar Alp-Milchwirtschaftkommission isch miar sehr wichtig. Miar Älpler söllend au d`Sita vo da Pura gseh und verstoh. Natürlich bringend miar üsi Ahliga au i. Danka Cyrill und allna für dia guat zäma Arbeit.
In dar Fachkommission Grossraubtier sind miar au vertreta. Do isch das Johr 1 Sitzig gsi. Grossraubtier a schwirigs Thema. As brucht Gedult und Usduur. Im Hintergrund wird viel gschaft. Danka Martin und euch allna für dia guat zäma Arbeit. Miar münd dra bliba für üsi Tier und fürd Alpwirtschaft!
Dar 13. März 2025 isch am Plantahof d`Alpmeistertagig gsi. Das Johr han i dörfa Laudatio halta und Ehrig vo da langjähriga Älpler zäma mit dar Svenja Simmen und am Töni Gujan ab halta.
Am 18. März 2025 isch am Plantahof Alpobig gsi. Dar Lieni und Andres hänt für da Vorstand teil gno.
20. März 2025 isch Johresversamlig vom Puraverband am Plantahof gsi. I han do törfa teil ne.
Dä sind Elvira und i am 3. April 2025 uf Bergün greisst. Flurina Brosi und Nicol Heinrich hänt sich bereit erklärt zum GV 2025 organisiere helfa. Dua hämmer dar hütig Tag grob organisiert.
Agrischa am 12. + 13. April 2025 in Chur. Stadt trifft Land, an volla Erfolg. Gratuliere am OK!
Anna- Andrea und ihr Team sind am Käsa gsi in dar Stadt Chur. Miar sind sehr dankbar das sich Mitglieder bereit erklärend zum am Stand Käse und Ziger herstelle. Herzliche Dank!
Am 25. April 2025 sind dar Lieni und i als Verträtig vom Bündner ÄlplerInnenverein and Abdankig vom Anton Bearth uf Bonaduz. Dar Toni isch 17. Johr lang Präsident gsi vo üsem Verein. An grossi Leistig! Er hät sich bis z`letscht sehr interessiert was im Verein lauft. Hin und wider hät er a glütet. An Usstusch wo ich als sehr Wertvoll erachtet han.---------
Am 10. Mai 2025 hät üsi Frühjohrstagig in Arosa statt gfunda. In dar Alpsennerei Maran hämer a interessanti Füahrig ka und a feina Apero gnossa. Interessants über Gmeind Arosa und über Churer Alpa isch üs nöcher brocht worda. In Langwies hämer z`Mittag übercho. Paula und David Zippert hänt üs ihra Betrieb vorgestellt. Sehr Idrücklich, d`bewirtschaftig net immer eifach. Dia ganz Familia mit ganzem Herza dabi.
An Interessante und Idrücklicha Tag isch as gsi.
Herzlicha Dank am Lieni fürs organisiera for Frühjahrstagig.
Blog hämer au dä Summer gschriba. Lisa Blümmel/Alp Steinigboden, Liane Becker/Schafalp-Löser, Silvana Schnyder Schafalp Samnaun und i hänt je 2 Blog gschriba. Ihar hänts im Bündner Bauer könna lesa. Herzlicha Dank da Schriberinna! Danka vill mol das Ihar an Iblick in eurem Älplerleba gebend.
Dano simmer endlich wieder ufd Alp. Früh sind Alpa das Johr bestossa worda. An warma und sunniga Juni, isch das schön gsi!
Juli bis anfangs August kalt und nass, in da höhera Laga häts sogar Rifa geh. Das hät da Weida net guat tua, isch dano nüma recht gwachsa. Im August isch kurz schön und warm gsi. Dä hät üs leida Wetter wider i gholt. As hät langsam a g`hängt, immer nass, Nebel. Im September da wieder a schön Wetter Ziit. Wia han i dia letschta Alptäg mit Sunna und Wärmi gnossa.
Regional Museum Ilanz hät an festi Usstellig zur Alpwirtschaft in dar Surselva. Dia wird im Jahr 2026 erneuert. Verschideni Älpler/Älplerinna us dar Surselva wirkend mit.
Im August sinds zu üs ufd Alp ko ga Filma und viel Froga stella. Dar ÄlplerInnenverein, Christian und i werden döt mitwirka. In was für a Form werdemer im Juni 2026 dä gseh.
Dar Herbst isch uf üsi Alpa i zoga. Prächtigi Alpabzüg hänt im ganza Kanton statt gfunga. Alpabzüg sind a Teil vom Alpsummer. Öffentlichkeitsarbeit isch au do wichtig.
Am 11. September 2025 hät am Plantahof dia jährlich Alpkäsprämierig statt gfunda. An schöna guat organisierta Ahlass isch as gsi. Herzlicha Dank fürs organisiera dar Svenja, Stefan, Michael und am Plantahof-Team!
Am 26. September 2025 hänt au das Johr Mahnfüür europawit brennt. Z`Hauptfüür isch das Johr in Arosa gsi. Im ganza Kanton händ Füür brennt, d`Bergbevölkerig isch zäma gstanda, für ihri Tier, ihri Alpa und üsi Heimat!
29. September 2025 hänt miar üsi zweit Vorstandssitzig vo dem Johr ka. Richtlöhn, GV und Älplerreis 2026 sind die wichtigschta Thema gsi.
Herr und Frau Felber hänt üs nomol 2000.—gspendet. Herr und Frau Felber möchten üs, üsi Tradition und Alpwirtschaft unterstütza. Herzlicha Dank!
Am 4.- 5. Oktober 2025 händ am Alp Spektakel in Seewis Anna-Andrea und ihras Team wieder käset. Herzlicha Dank!
Au das Johr häts immer wieder verschidani Media Arbet geh. As isch a wichtiga Punkt im Johr. So könnt miar üsi Ahliga plaziera.
Herzbluat fürd Alp , das hänt ihar Älplerinna und Älpler. Käsa, und zum Veh luaga tüant ihr im Summer üf da Bündner Alpa.
Im Team oder allei uf dar Alp, be Rega, Schnee oder Sunna. Uf euch isch Verlass.
An da Käspremiarig isch as a Freud z gseh was für guata Käs ihar produzierend.
I gratuliera euch vo Herza!
Vo Herza Danka für eura Isatz uf üsi Alpa!
Dam Vorstand Anna-Andrea, Elvira, Lieni und Andres dank ich an dära Stell herzlich für dia guati Zämaarbeit und ihra gross Isatz für da Bündner Älplerverein.
Miar sind inzwischa a guat i gspielts Team. Jeda vo euch bringt sich döt i, wo er sini stärkina hät. Für mi sind ihar wertvoll, i schätza euch sehr.
I danka jedem vo euch für euchi gross Arbeit für üsa Verein!!
Dar Svenja Simmen, am Stefan Bless und am Michael Schmid danki für dia guat Zämaarbeit. Am Plantahof dank i fürs Gastrecht und jeglichi Unterstützig.
Am Thomas Roffler und da Mitarbeiter vom Bündner Puraverband, herzlicha Dank für euchi Unterstützig.
Da Mitglieder, zwichtigschta in üsam Verein, euch danki für dia gross Unterstützig. Immer wieder kann i uf euch zähla. Herzlicha Dank!
Letscht Summer han i das Zitat gseh
Ein jeder Stand
in jedem Land
Lebt vom Bauernstand
Das hät mi zum nochdenka a gregt. Isch as hüt würklich so das d`Lüt sich dem nüma bewusst sind?
Miar Älpler chönd Landwirtschaft dar nicht Pürlich Gsellschaft nöcher bringa. Nützend die Sympathie fürd Alpwirtschaft!
Für da Bündner ÄlplerInnaverein dörfa im Isatz sie, Summer und Winter isch abwechsligsrich bringt immer wieder neue Herusfordriga mit sich.
As isch a schöns Johr gsi. Wünscha euch allna a guata Winter und vili schöni Erinneriga an da Alpsummer 2025!
Hebats guat!

Euri Präsidentin
Christa Buchli