Jahresbericht der Präsidentin 2024
A wunderschöna Tag hämer am 4. November 2023 in Brigels törfa erleba. Viel isch üs präsentiert worda. D`Sennerei und d`Talina hämer dörfa ga a luaga, lüpfigi Musik hät üs dur da Tag begleitet.
Am 10. November 2023 hät dia hürig Hauptversammlig vom SAV in Lungera statt gfunda. An dera Versammlig isch Karin Ehrensberger als neue Delegierti vom Kanton Graubünda gwählt worda.
Am 15. November 2023 isch in Bern dia jährlich Zämakunft vor IG Alpkäs gsi.
An beidna Anläss hät dar Lieni Bärtsch teil gno. Danka Lieni.
Am 4. Dezember 2023 isch d`Regulation vo da Wölf im Kanton Graubünda zerscht mol mit dar Jägerschaft g`startet. Am 8. Dezember 2023 isch an Isproch bim Bundesverwaltigsgricht, vo da Naturorganisationa, i ganga.
Dia Regulation isch g`stoppt worda. Am 11. Dezember 2023 isch dar gross Teil vor Jagt wider uf gno worda.
Am 7. Dezember 2023 sind dar Peter Küchler und i, als Bündner Delegation, nach Bulle g`fahra. D`Alpsaison isch als Immaterielles Kulturerbe vor UNESCO uf gno worda. Dä welsch Flair isch für mi neu und intressant gsi. As isch an würdiga, schöna Anlass gsi.
Am 4. Januar 2024 hämer dia erscht online Sitzig für das Wintergspröch abhalta. Vom Vorstand sind Anna-Andrea und i dabi gsi. Dia erscht Vorstandssitzig, vom neu zämagsätzta Vorstand, hämer am 9. Januar 2024 am Plantahof ka. Perrine isch no zum letschta mol and Vorstands-Sitzig iglada gsi.
D`Elvira hät kurzfrischtig net könna teil neh. Ihri Familia hät an schwera Schigsalsschlag müassa akzeptiera.
Perrine hät sich dä bereiterklärt zum z`Älpler Büro witer füara, bis Elvira kann überneh.
Am 13. Januar 2024 hät Andres für da Vorstand am Älplertreff in Landquart teil gno.
Am 1. Februar 2024 hät in Zollikofen/BE an Anlass unter am Thema „Digitalisierung auf der Alp“ statt gfunda. Christian und i hänt teil gno. As isch an interessanta aber au sehr theoretische Anlass gsi. Was do da Lüt net allas in da Sinn chund, hät mi zum Stuna brocht.
Wintergspröch hät am 12. Februar 2024 in Landquart statt gfunda. Dä Wintergspröch hämer zäma mit dar Alp- und Milchwirtschaftkommission vom Puraverband und am Plantahof organisiert. Doris Theiner, Claudio Gregori und Alexandra Juon sind Referenta gsi. As isch an guat bsuachta, i dörf säga glungana Anlass gsi.
Am 12. März 2024 hät am Plantahof d`Alpmeistertagig statt gfunda. Für da Älplerverein han i törfa z`Laudatio halta für dia langjähriga Älpler und Alpfunktionära. So viel Härzbluat und Isatz für üsi Bündner Alpwirtschaft, as isch an Ehr gsi. I han gstund, zwei Älpler sind 50 Johr aktiv z`Alp.
Am 13. März hät dar Res Iten die letscht Sitzig gleitet vor Alp- und Milchwirtschaftskommission. I han online teil gno. In dar Alp- und Milchwirtschaftskommission hänt au das Johr 4 Sitziga stat gfunda. An eini hät Anna-Andrea für mi teil gno. I finda as immer wieder interessant d`Sita vo da Pura z`ghöra.
I danka euch für dia interessant und guat Zämaarbet in dar Kommission.
In dar Fachkommission Grossraubtier sind miar vom Älplerverein au Mitglied. Au do hänt das Johr 4 Sitziga stat gfunda. Grossraubtier, a schwierigs und leids Thema. As brucht Geduld, Usduur und ganz viel Isatz für üsi Alpwirtschaft und Landwirtschaft. As got nur in klina Schritt vorwärts. As isch wichtig das miar do dra blibend, für üsi Tier und Alpa.
Danka allna in dar Kommission für eura Isatz!
Am 28. März hät in Cazis GV vom Puraverband stat gfunda. Dar Andres hät für da Bündner ÄelplerInnenverein teil gno.
Dä sind a Delegation vom Älplerverein am 20. April ins Toggaburg greist, zum dar Sina und am Bruno am Hochzit Spalier sto. Sie hänt Freud ka das ar ko sind. Danka vil mol!
Agrischa 2024, isch am 27.+ 28. April in Grüsch gsi. Anna-Andrea und ihras Team sind am Käsa gsi in Grüsch. Miar sind sehr dankbar das sich Mitglieder bereit erklärend zum am Stand Käse und Zieger herstelle. Herzlicha Dank!
Das isch immer sehr intensiv für d`Anna- Andrea bis allas organisiert und parat isch. Danka vil mol Anna-Andrea für dini Arbet!
11./12.Mai 2024 simmer dä ufd Reis ins Südtirol. 64 Älplerinna und Älpler sind mitcho. Im Vorus häts viel z`organisiera geh. Mit zwei Reisebus simmer dä in
Landquart g`startet. Durs Prättigau-Flüalapass- Engadin-Münstertal. Döt hämer dar erscht Halt gmacht im Agricultura Val Müstair. Sennerei, Metzgerei und Getreidemühle hämer besichtigt und a feina Züni übercho. Witer dürs Vinschgau, und nochama währschafta und sehr guata Zmittag Richtig Passeiertal.
Dar Albert und Clara Pixner hänt üs nocher durs Andreas-Hofer-Museum gführt. Au hämer am Albert sini Schof dörfa bestuna. An unterhaltsama und gmüatlicha Obed hämer gnossa. Am Sunntig simer über da Jaufenpass noch Innsbruck. Döt hämer di Bergisel-Sprungschanza aglueget und im Panoramarestaurant Zmittag gässa. Nachama Zvierihalt simer den gega Obet wider heil in Landquart acho. Liaba Peg, du häsch dia Reis perfekt organisiert und üs dia zwei Tag sehr guat gfüart. As wirt üs unvergesslich und in schöner Erinnerig bliba. Vila herzlicha Dank Peg!
Dä Summer hämer in dar Pura Zitig törfa Blog schriba. So könnt miar, mit da angrenzende Kantön zäma, abwechselnd schriba. Nögscht Summer würdemer au gära Blog schriba. Dazua bruchamer aber as paar vo euch wo bereit sind z`schriba. Wenn das öpert wet, meldend euch bi miar. As wär au amol interessant wen an Alpmeisterinn oder Alpmeister schriba würd. Das wär an neua Blickwinkel vor Alpwirtschaft.
A kalta nassa Früehlig mit viil Schnee, isch dar Früehlig 2024 gsi. Tüfi Alpa sind eher spöter in da Summer g`startet. Jeda Tag Rägahosa und Rägajaka. Öpa mol han i au denkt, Sunna wo bisch. As hät saftigi Weida und viil Wasser ka. Endlich gäga mitte/enda Juli isch as schön und heiss cho.
So lot sichs doch grad eifacher Älpler si. Sunna gniessa, chöna bim Veh uf dar Weid au as biz verwila. Das isch doch s`Älpler Klischee? Jetzt han ichs in volla Züg gnossa.
Im Juli hämer üsi Stellignahm zur Vernehmlassig Jagtverordnig abgeh. Danka Andres fürs verfassa vor Stellignahm.
Mit dar Alp-Milchwirtschaftskommission bin i im August uf Davos ins Dischma. Dar neu Präsident Cyril Graf hät sini Heimat zeigt. Davos isch prägt vo Privatalpa. As isch an interessanta und idrücklicha Tag gsi.
As isch Herbst worda und uf da Weida trocha, zum Teil hänts z`wenig Wasser. Das hät afangs Summer niemert für möglich ghalta.
An Kälteibruch hät sich a kündet. Dar Winter hät sich zeigt, eifach z`früa. A teil Regiona hänt grad a bez Schnee übercho. As hät vorzitigi Alpentladiga geh. Über allas gseh isch as a kurza Alpsummer gsi.
Trotz Schnee hänt prächtigi Alpabzüg im ganza Kanton statt g`funda.
Alpabzug, as isch a Teil vom Alpsummer, Öffentlichkeitsarbeit isch au do wichtig.
Am 12. September 2024 hät am Plantahof in Lanquart d`Alpkäsprämierig stattgfunda. As isch an sehr schöna Anlass gsi! Herzlicha Dank fürd Organisation am Töni, Stefan, Michael und Team!
Am 27. September hänt europawit Mahnfüür fürd Alpwirtschaft brennt. Z`Hauptfüür isch das Johr in Sent gsi. Im ganza Kanton händ Füür brennt, d`Bergbevölkerig isch zäma gstanda, für ihri Tier, ihri Alpa und üsi Heimat! As isch a friedlichs, starks Zeicha, an dia net pürlich Bevölkerig!
Herr und Frau Felber hänt üs nomol 2000.—gspendet. Herr und Frau Felber möchten üs, üsi Tradition und Alpwirtschaft unterstütza. Herzlicha Dank!
Am 5.- 6. Oktober 2024 händ am Alp Spektakel in Seewis Anna-Andrea und ihras Team wieder käset. Herzlicha Dank!
Au das Johr häts immer wieder verschidani Media Arbet geh. I denka as isch wichtig gäga usa üs und üsi Aliga verträta und erklära.
Mit Liidaschaft und Freud zum üs avertrauta Veh luaga und guati Produkt herstella, dass got nu mit Herzbluat! I danka euch allna Älplerinna und Älpler für da gross Isatz uf üsa Alpa!
An da Käspremiariga isch as a Freud z gseh was für guata Käs iar produzierend.
I gratuliera euch vo Herza!
Miar müend üsi Tradition pflega und bewahra!
Dam Vorstand Anna-Andrea, Elvira, Lieni und Andres dank ich an dära Stell herzlich für dia guati Zämaarbeit und ihra gross Isatz für da Bündner Älplerverein. Nur zäma chömand miar witer.
I danka jedem vo euch für euchi gross Arbeit für üsa Verein!!
Dam Töni Gujan, Stefan Bless und am Michael Schmid danki für dia guat Zämaarbeit.
Am Thomas Roffler und da Mitarbeiter vom Bündner Puraverband, herzlicha Dank für euchi Unterstützig.
Am Plantahof dank i fürs Gastrecht und am Peter Küchler für d` Unterstützig!
Da Mitglieder, zwichtigschta in üsam Verein, euch danki für dia gross Unterstützig. Immer wieder kann i uf euch zähla. Herzlicha Dank!
As isch wider a schöns und intensivs Johr gsi. Wünscha euch allna a guata Winter und vili schöni Erinneriga an da Alpsummer 2024!
Euri Präsidentin
Christa Buchli