Jahresbericht der Präsidentin 

Älpler/Bergler/Jäger Stammtisch. Üsi GV vom 5. November 2022 in Pany isch an glungna und schöna Anlass gsi. Dia Stimma vo da Schüpferi-Meitla händ z`Herz erwärmt. Dä Tag wird üs no lang in schöner Erinnerig bliiba. 

Am 30. November 2022 sind as paar vo üs uf Disentis greist. An grossa Empfang hät zu Ehra vom Nationalratspräsident Martin Candinas stattgfunda. An idrücklicha Anlass in dar Klosterkircha Disentis. I han am Martin Candinas dörfa an Pataschaft für a Geiss übergeh. Im Nama vom Bündner Puuraverband, Puuraverein Surselva und vo üs, am Bündner Älplerverein. I hoffa dar Martin und sini Familia händ Freud ka an dära Pataschaft. 

Am glicha Obig, am 30. November 2022, hämer üsi erscht Vorstandssitzig abghalta. Insgesamt hämer üs vier mol troffa. 

D`Anna-Andrea isch zerscht mol dabi gsi an dar Vorstandssitzig. As macht miar Freud wie angaschiert sie und dar ganz Vorstand isch.  Am 7. Januar 2023 händ grad drü vom Vorstand in Landquart am Älplertreff teilgno. Thema isch gsi «Hirten unter Druck - Hüten mit dem Wolf», moderiert vom Kasper Schuler. I dörf säga die junga Hirta händ miar döt a guata Idruck hinterloh. 

Am 12. Januar 2023 hämer dia erscht vo drü Sitziga vor FK Grossraubtier ka. Do isch as net grad immer so einfach. Miar gsehnt Sorga und Problem… doch was macha? I danka am Martin Capaul und dar ganza Kommission für da gross Isatz. 

«Emotional und Belastend» ischs Thema gsi am 13. Januar 2023 an dar Tagig am Plantahof. Au do sind Grossraubtier a grosses Thema. Ma spürt, d`Grenza vo üs allna sind erreicht. 

Afangs Februar händ miar mit am Puraverband am Bundesrot Rösti a Brief gschickt. Miar händ druf ufmerksam gmacht dass as  Lösiga brucht – dringend - mit da Grossraubtier!  

Am 9. März 2023 isch in Vals an sehr guat bsuachta Vortrag gsi mit am Marcel Züger. 

Döt händ miar 300.—Fr and Kosta geh. 

Am 28. März bin i an da Alpobig vo da Schüaler am Plantahof iglada gsi. Dar Ustusch mit da Schüaler isch interessant gsi. 

Am 4. April hämer dia erscht Sitzig vor Saison vo da Alp und Milchwirtschaftskommission ka. Im ganza hämer döt drü Sitziga ka. An dar Summersitzig han i das Johr leider net könna teilneh. Dar Ustusch zwüscha üs Älpler und Pura isch wichtig und wertvoll! I danka am Res Iten und dar Kommission für dia wertvoll Zämaarbeit! 

D`Richtlöhnverhandliga sind a feschta Beschtandteil vom Johr. Im letschta Johr hämer d`Richtlöhn zerscht mol in Prozent grechnet. As hät folgendi Erhöhiga geh: 

Bi der Spalta Afänger ohni Usbildig isch dr Lohn um eis Prozent agschtiga, bi allna andera Kategoria um zwei Prozent. 

Dä Summer sind uf  üsa Alpa  immer wieder Älpler/Älplerinna gsuacht worda. I bin grad as bez erstuunt. As stoht miar net zue, z`urteila obs richtig oder falsch isch as Arbeitsverhältnis z`beenda. Was i aber us Gspröch mit Älpler/inna und Alpmeister/inna säga kann: Im Herbst/Winter unterschriibend beidi Parteia an Vertrag…dä isch denn au bindend! Im Herbst söti ma nüma über da Lohn und suschtigs diskutiera müessa. 

Ende April sind dar Lieni, Andres und i and Alpmeistrtagig an da Plantahof. Üs sind dia neuschta Informationa zum Alpsummer 2023 mitteilt worda. 

Agrischa 2023 hät am 27. – 28. April in Ilanz stattgfunda. D`Anna-Andrea hät d Organisation vom Käsa übernoh, danka diar Anna-Andrea. 

Sie isch mit am Fabian, dr Sina und am Urs an dena zwei Tag in Ilanz am Chäs und Ziger herstelle gsi. Ds Interessa vo da Lüt isch immer gross. I denka as isch an wichtiga Bitrag vo üs. Danka euch für da Isatz in Ilanz. 

Am 13. Mai 2023 hämer üs zur Frühjohrstagig in Klosters troffa. Bim Urs uf am Hennagada händ miar, mit viel Wetterglück, an herrlicha Tag zäma ka. Dar Michael Schmid, Stefan Bless und dar Töni Gujan händ üs übers Wichtigsta zum Alpsummer 2023 informiert. As isch an klini Alpmeistertagig gsi. 

D`Firma Schenk/Düsen hät üs zum Kellerklima Informationa geh und a neui Befüachtigsahlag vorgschtellt. 

Nach ama kalta/nassa Früahlig sind miar doch früa in da Alpsummer gstartet. As isch an Summer mit extrema Wetterlaga gsi. Mol heiss und trocha, da no nass und eher kalt. Im ganza isch as an da meischta Ort an fuatterricha und langa Alpsummer gsi. 

As isch langsam am Herbst entgäga. Wolf und Wasser as grossas Thema au dä Summer uf da Alpa. Do im Kanton hämer  meh oder weniger mit am Wasser guat ka. 

Dä Summer hämer in da Pura Zitig törfa Blog schriba. So könnt miar, mit da angrenzende Kantön zäma, abwechselnd schriba. Dar Bündner Bauer würd gära wider mit üs da Blog schriba. Dazua bruchamer aber as paar vo euch wo bereit sind z`schriba. Wenn das öpert wet, meldend euch bi miar. 

Im Wandermagazin vom Parc Ela hät dar Vorstand a Interview könna geh. I glauba as isch an guata Bricht worda. Miar händ üsi Asicht zu verschidana Thema könna platziera. 

Am 2. September hät dar Käsmarkt in Ilanz statt gfunda. Dar Walter und d Christiana sind au das Johr für üs ga käsa. Danka viil mol euch zwei! 

As isch Herbst worda, miar sind mit üsa Tier wieder ins Tal zoga. I stuna was für schöni Alpabzüg im ganza Kanton stattfindend. Au do in Brigels findet jedes Johr an grossa Alpabzug statt. Danka für die gross Arbeit! As isch a Teil vom Alpsummer, Öffentlichkeitsarbeit isch wichtig. 

Am 15. September 2023 hät am Plantahof in Lanquart d`Alpkäsprämierig stattgfunda. As isch an sehr schöna Anlass gsi! Herzlicha Dank fürd Organisation am Töni, Stefan, Michael und Team! 

Am 29. September hänt europawit Mahnfüür fürd Alpwirtschaft brennt. Z`Hauptfüür isch das Johr in Klosters gsi. Thomas Roffler, Hansueli Roth und i sind Gastredner gsi. Im ganza Kanton händ Füür brennt, d`Bergbevölkerig isch zäma gstanda, für ihri Tier, ihri Alpa und üsi Heimat! As isch a friedlichs, doch starks Zeicha, Richtig Unterland! 

Herr und Frau Felber hänt üs nomol 2000.—gspendet. 

Im August sind Herr und Frau Felber zu miar ufd Alp cho. Sie sind sehr interessiert an dr Alpwirtschaft und wend üsa Verein unterstütza. Dar Anlass in Vals hämer mit Geld vo ihna unterstützt. 

Am 7.- 8. Oktober 2023 händ am Alp Spektakel in Seewis Anna-Andrea und ihras Team wieder käset. Herzlicha Dank! 

An dar Abdankig vom Reto Beeli ischt Kollekte üs g`spendet worda, as sind 445 Franka. 

Im Summer isch dar Peter Luzi-Mathis vo Jenaz gestorba. Kollekta und Spenda sind au an üsa Verein ganga, insgesamt Fr.xxxx 

Mit Liidaschaft zum üs avertrauta Veh luaga und guati Produkt herstella, dass got nu mit Herzbluat! Herzlichen Dank allna Älplerinna und Älpler für ihra gross Isatz uf üsa Alpa! 

An da Käspremiariga isch as a Freud z gseh was für guata Käs iar produzierend. 

I gratuliera euch vo Herza! 

Miar müend üsi Tradition pflega und bewahra! 

Dam Vorstand Perrine, Anna-Andrea, Lieni und Andres dank ich an dära Stell herzlich für dia guati Zämaarbeit und ihra gross Isatz. Nur zäma chömand miar witer. 

I danka jedem vo euch für euchi gross Arbeit!! 

Dam Töni Gujan, Stefan Bless und am Michael Schmid danki für dia guat Zämaarbeit. 

Am Thomas Roffler und da Mitarbeiter vom Bündner Puraverband, herzlicha Dank für euchi Unterstützig. 

Am Plantahof dank i fürs Gastrecht und am Peter Küchler für d` Unterstützig! 

Da Mitglieder, zwichtigschta in üsam Verein, euch danki für dia gross Unterstützig. Immer wieder kann i uf euch zähla. Herzlicha Dank! 

As isch a intensivs aber schöns Johr gsi.  Wünscha euch allna a guata Winter und vili schöni Erinneriga an da Alpsummer 2023! 

Euri Präsidentin 

Christa Buchli